Аныгы үйэҕэ интернет сайдыыта күүскэ дьайан эрэр. Мин кыра сырыттахпына саныыр этим "Арай киһи илиитин ытыһыгар батар телевизор баара буоллар" диэн. Аҕыйах сыл ааһар эмискэччи сотовай телефон баар буолар, ол иннинэ пейджер диэн баара да ону мин биирдэ эрэ харахтаан көрбүтүм. Ок тээ, бу убайым ынырык крутой киһи диэн толкуйдаабытым пейджерын көрөн баран. Онтон биһиэхэ оҕолорго аралдьыйарбыт диэн кассетаннан барар  магнитофон. Магнитофон тыаһа дьэ олус үчүгэй буолааччы... Пленка кассетатыгар харандаас уган баран перемоткалыыр этибит.

Дьэ онтон сотовай кэллэ, ол даҕаны сорох эрэ дьоҥҥо баар буолааччы. Биир эдьиийбэр баарын уларсан, змейка оонньуутун оонньооччубут. Ити кэнтэн сайдыы түргэтээтэр-түргэтээн испитэ. Пейджер, телефон, тамагоча, тетрис, нокиа, сони эриксон, моторола. Онтон биирдэ өйдөммүппүтүгэр, студенныы сылдьан Андроид телефон баар буолла.